Փետրվարի 19-ը՝ գիրք նվիրելու օրը իսկական տոն էր Արամ Խաչատրյանի տուն-թանգարանում:
Ամբողջ օրվա ընթացքում չէր դադարում այցելուների հոսքը: Իհարկե բոլորը ստացան իրենց նվեր-գրքերը, իսկ Թանգարանի առաջին հինգ այցելուները ունեցան նաև անվճար այցելության հնարավորություն:
Տուն-թանգարանը ևս նվեր-գրքեր ստացավ տարբեր կազմակերպություններից:
Օրը իրենց գեղեցիկ ելույթներով գեղեցկացրեցին Ստ. Ջրբաշյանի անվան երաժշտական դպրոոցի կամերային նվագախմբի պատանի երաժիշտներն ու Երևանի Դ. Դեմիրճյանի անվան հ.27 հիմնական դպրոցի աշակերտները:
Արամ Խաչատրյանի տուն-թանգարանի տնօրեն Արմինե Գրիգորյանը նվեր-գրքեր հանձնեց Ստ. Ջրբաշյանի անվան երաժշտական դպրոոցի տնօրեն Մամիկոն Անդրեասյանին և Երևանի Դ. Դեմիրճյանի անվան հ.27 հիմնական դպրոցի Մասնագիտացված կրթական աջակցությունների գծով տնօրենի տեղակալ Գայանե Ավետիսյանին:
Փոքրիկ երաժիշտների կատարմամբ հնչեց Ուզունդարան «Գայանե» բալետից: Իրենց գեղեցիկ ասմունքներով հանդես եկան նաև դպրոցականները՝ ամենայն հայոց բանաստեղծ Հովհաննես Թումանյանի ծննդյան 155-ամյա հոբելյանը շնորհավորելով նաև իրենց կատարմամբ՝ «Ա՜խ, ի՜նչ լավ են սարի վրա»:
Երեխաները շրջեցին նաև թանգարանում, մասնակցեցին վիկտորինայի, լուծեցի երաժշտական խաչբառ: Նրանք հնարավորություն ունեցան VR ակնոցների շնորհիվ հայտնվել կոմպոզիտորի աշխատասենյակում և հետևել «Գայանե» բալետի ամենահայտնի հատվածներից մեկի՝ «Սուսերով պարի» ստեղծման ընթացքին:
Տոնական օրվա գեղեցիկ ավարտը «Ճամփորդենք Խաչատրյանի հետ» անիմացիոն ֆիլմի ցուցադրությունն էր: Այն մեծ հետաքրքրությամբ դիտեցին ոչ միայն երեխաները, այլ նաև՝ մեծահասակները:
