Արամ Խաչատրյանի տուն-թանգարանի, բրիտանական BOOSEY & HAWKES և ճապոնական ZEN-ON MUSIC երաժշտական հրատարակչական ընկերությունների հետ համագործակցությամբ Տոկիոյում լույս է տեսել Khachaturian Explorations (Խաչատրյանական հետազոտություններ) գիրք-ուղեցույցի ճապոներեն տարբերակը: Այն Արամ Խաչատրյանի տուն-թանգարանի տրամադրած արխիվային նյութերի հիման վրա ներկայացնում է Արամ Խաչատրյանի կյանքի ու կենսագրության մանրամասները, նրա ստեղծագործական ուղին, ստեղծագործությունները:
Գիրք-ուղեցույցում զետեղված են Ա. Խաչատրյանի կենսագրության և ստեղծագործությունների տարեգրությունը, սիմֆոնիաների, կոնցերտների, նվագախմբի համար գրված այլ ստեղծագործությունների, բալետների, կինոերաժշտության, վոկալ, կամերային և գործիքային ստեղծագործությունների յուրահատուկ կերպով կատարված հետազոտությունները: Այստեղ ընդգրկված են նաև հատվածներ Արամ Խաչատրյանի նամակներից, կոմպոզիտորի մասին նշանավոր երաժիշտների ասույթներ, երաժշտական կատարումների հղումներ:
Khachaturian Explorations գիրք-ուղեցույցը Արամ Խաչատրյանի տուն-թանգարանի և BOOSEY & HAWKES հրատարակչության երկրորդ համագործակցության արդյունքն է: Դեռևս 2014 թվականին Լոնդոնում հրատարակվել էր նշված գրքի անգլերեն տարբերակը:
