Հայաստանի Հանրային Ռադիո. «Հատվող եթեր»
Զրույց Արամ Խաչատրյանի տուն-թանգարանի տնօրեն, Երևանի Կոմիտասի անվան պետական կոնսերվատորիայի պրոֆեսոր, միջազգային մրցույթների դափնեկիր, հայ ժամանակակից դաշնամուրային արվեստի վառ ներկայացուցիչներից Արմինե Գրիգորյանի հետ: Արվեստագետ, որը մեծ դերակատարություն ունի և՛ որպես բազմաթիվ խաչատրյանական նախագծերի հեղինակ, և՛ որպես մեծ կոմպոզիտորի անունը կրող Արամ Խաչատրյանի անվան եռյակի դաշնակահարուհի:
Զրույցի ընթացքում Տուն-թանգարանի տնօրեն Արմինե Գրիգորյանը պատմեց հոբելյանական տարվա Արամ Խաչատրյանի տուն-թանգարանի բամաթիվ նախաձեռնությունների ու ծրագրերի մասին: Միաժամանակ Արմինե Գրիգորյանը ընդգծեց, որ հոբելյանը ընդամենը առիթ էր մեկ անգամ ևս բարձրաձայնելու. հնչեցնելու և խոսելու Մեծն Մաեստրոյի ստեղծագործական ժառանգության մասին, բայց դա նաև մեր ամենօրյա պատասխանատու և պատվաբեր աշխատանքն է:
Արամ Խաչատրյանի ծննդյան 120-ամյակին նվիրված հոբելյանական միջոցառումների լայնածավալ և բազմաժանր ծրագիրը ներառում էր համերգներ, հյուրախաղեր, հրատարակություններ, գիտաժողովներ, ցուցադրություններ, դասախոսություններ, ֆիլմեր, հեռուստա և ռադիո հաղորդումներ, թանգարանային նորամուծություններ, ֆոնդային համալրումներ և այլն: Տարվա ընթացքում իրականացվել է ավելին, քան նախատեսված էր:
Ամբողջական հարցազրույցը կարող եք ունկնդրել այստեղ:
Արամ Խաչատրյանի տուն-թանգարանը սիրված վայր է մեծ երաժշտի ոչ միայն հայ, այլև օտարերկրացի երկրպագուների համար՝ այցելուների առջև բացելով խաչատրյանական մի նոր աշխարհ, ուր հառնում է հայ ժողովրդի ամենասիրված և ամենաճանաչված զավակներից մեկի պայծառ կերպարը` իր բեղուն ու իմաստալից կյանքի հետաքրքիր ու հուզումնալից էջերով:
Այստեղ կարելի է ունկնդրել աշխարհահռչակ մաեստրոյի համաշխարհային դասական երաժշտության գանձարանում իրենց ուրույն տեղը գրաված և ամբողջ աշխարհում մեծ ժողովրդականություն վայելող անմահ երաժշտությունը, ճարտարապետական յուրահատուկ ոճով և ինքնատիպությամբ աչքի ընկնող ցուցասրահներում և հուշատանը տեսնել հազվագյուտ և բացառիկ արժեք ներկայացնող ցուցանմուշներ, որոնք կպատմեն համաշխարհային մեծ հռչակ վայելող արվեստագետի ու քաղաքացու կյանքի հայտնի և անհայտ էջերի, գործունեության, անվանի մարդկանց հետ հետաքրքիր հանդիպումների, հիշարժան դեպքերի և ստեղծագործական հարուստ ժառանգության մասին:
